നെന്മാറ ബ്ലോക്ക് ആത്മ സ്കീമിന്റെയും അയിലൂർ കൃഷിഭവന്റെയും സംയുക്താഭിമുഖ്യത്തിലാണ് ഡ്രോൺ ഉപയോഗിച്ച് നെൽപ്പാടങ്ങളിൽ രാസവളവും സസ്യ വളർച്ച പ്രേരകവും തളിക്കുന്ന രീതി പരിചയപ്പെടുത്തിയത്. ആത്മയുടെ നേതൃത്വത്തിൽ നെൽ കൃഷിയിൽ ശാസ്ത്രീയ കൃഷി രീതിയിൽ സാങ്കേതിക വിദ്യ പ്രയോഗിക്കുക എന്ന ലക്ഷ്യത്തിന്റെ ഭാഗമായാണ് ഡ്രോൺ ഉപയോഗിച്ച് വളങ്ങൾ നെൽച്ചെടികളിലേക്ക് തളിച്ചു നൽകിയത്. നാനോ യൂറിയയും സൂക്ഷ്മ സസ്യ വളർച്ച പ്രേരകങ്ങളും ഉൾപ്പെടുന്ന ലായനിയാണ് ഡ്രോൺ ഉപയോഗിച്ച് പരീക്ഷണ തളിക്കൽ നടത്തിയത്. ലായനി രൂപത്തിലുള്ള നാനോ യൂറിയയും, സസ്യ വളർച്ച പ്രേരകമായ സാഗരിക യുടെയും ഉൽപാദകരായ ഇഫ്ക്കോ യുടെ സഹകരണത്തോടെയാണ് സൗജന്യമായി അയിലൂർ കൃഷിഭവനിലെ പുത്തൻതറ പാടശേഖരത്തിലെ തെരഞ്ഞെടുത്ത 10 കർഷകരുടെ കൃഷിയിടങ്ങളിൽ തളിച്ചത്. ഒരു ഏക്കർ നെൽപ്പാടത്ത് നാനോ യൂറിയയും സസ്യ വളർച്ച പ്രേരകവും തളിക്കുന്നതിന് 10 മിനിറ്റിൽ താഴെ മാത്രമാണ് സമയം വേണ്ടിവന്നത്. ഇതുമൂലം രാസവളങ്ങളും മറ്റും സസ്യങ്ങൾക്ക് നേരിട്ട് ഇലയിലൂടെ ലഭിക്കുമെന്നും ചുരുങ്ങിയ സമയത്തിനുള്ളിൽ കൂടുതൽ പ്രദേശത്ത് കുറഞ്ഞ ചെലവിൽ വളപ്രയോഗം നടത്താൻ കഴിയുമെന്നും മണ്ണിലൂടെയും ജലത്തിലൂടെയും വളം നഷ്ടപ്പെടാതെ ഇലയിലൂടെ നേരിട്ട് ചെടികൾക്ക് ലഭിക്കുമെന്ന മേന്മയുണ്ടെന്ന് കൃഷി അധികൃതർ വിവരിച്ചു. അര ലിറ്റർ നാനോ യൂറിയയാണ് ഒരേക്കർ നെൽപ്പാടത്ത് 10 ലിറ്റർ വെള്ളത്തിൽ കലർത്തി തളിച്ചത്. മിനിറ്റുകൾക്കകം നെൽപ്പാടങ്ങളിലെ വളപ്രയോഗം തീർന്നത് കൗതുകത്തോടെ കർഷകർ നോക്കി നിന്നു. കോയമ്പത്തൂർ ആസ്ഥാനമായുള്ള കമ്പനിയാണ് ബാറ്ററിയിൽ പ്രവർത്തിക്കുന്ന ഡ്രോൺ നെൽപ്പാടങ്ങൾക്ക് മുകളിലൂടെ പറത്തിയത്. കർഷകർക്ക് നേരിട്ട് ഈ കമ്പനി മണിക്കൂറിന് 500 രൂപ നിരക്കിൽ വളപ്രയോഗം നടത്തിക്കൊടുക്കാറുണ്ടെന്ന് അറിയിച്ചു.
അയിലൂർ പഞ്ചായത്തിലെ ഡ്രോൺ ഉപയോഗിച്ചുള്ള രാസവള പ്രയോഗ പ്രായോഗിക പരിചയപ്പെടുത്താൻ പഞ്ചായത്ത് പ്രസിഡന്റ് എസ്. വിഘ്‌നേഷ് ഉദ്ഘാടനം ചെയ്തു. കൃഷി അസിസ്റ്റന്റ് സി. സന്തോഷ്, പരിപാടി വിശദീകരിച്ചു. ആത്മയുടെ ബ്ലോക്ക് ടെക്നോളജി മാനേജർ (ബി പി എം) എൻ. എം. അസ്‌ലം സാങ്കേതിക വിവരങ്ങളും പദ്ധതിയുടെ മേന്മയെ കുറിച്ചും കർഷകർക്ക് ക്ലാസ് എടുത്തു. ആത്മ അസിസ്റ്റന്റ് ടെക്നിക്കൽ മാനേജർ കെ. സുനിത, കൃഷി അസിസ്റ്റന്റ്, ജി.ദീപിക, സംയുക്ത പാടശേഖരസമിതി പ്രസിഡന്റ് എ. പ്രഭാകരൻ, സെക്രട്ടറി കെ. നാരായണൻ, വിവിധ പാടശേഖരസമിതി ഭാരവാഹികളും കർഷകരും പങ്കെടുത്തു.
പ്രാദേശിക വാർത്തകൾ WhatsApp ൽ ലഭിക്കുന്നതിന് താഴെ Click ചെയ്യുക 👇🏻
https://chat.whatsapp.com/Egc8ACcg23sLWDlwBl2Fcx
