പശ്ചിമഘട്ട മലനിരകളിലെ ഉൾക്കാടുകളിലും നിത്യഹരിത വനങ്ങളിലും മാത്രം സാധാരണയായി കണ്ടുവരുന്ന, വംശനാശഭീഷണി നേരിടുന്ന സിംഹവാലൻ കുരങ്ങുകൾ നെല്ലിയാമ്പതി ചുരംപാതയിൽ വ്യാപകമായി പ്രത്യക്ഷപ്പെടുന്നു. വനത്തിനകത്ത് മാത്രം കാണപ്പെടുന്ന ഈ അപൂർവ ജീവികൾ അടുത്തകാലത്തായി ചെറുനെല്ലി മുതൽ അയ്യപ്പൻതിട്ട് വരെ നീളുന്ന ചുരം പാതയോരങ്ങളിൽ കൂട്ടമായി സഞ്ചരിക്കുന്നു.
പോത്തുണ്ടി മുതൽ കൈകാട്ടി വരെയുള്ള ചുരംപാതയിൽ ഇവയെ പതിവായി കാണാൻ കഴിയുന്നതോടെ സഞ്ചാരികളുടെ ശ്രദ്ധയും ആകർഷിക്കപ്പെടുകയാണ്. കുണ്ടറച്ചോലയ്ക്ക് മുകളിലുള്ള പ്രദേശങ്ങളിൽ 50-ലധികം സിംഹവാലൻ കുരങ്ങുകളടങ്ങുന്ന വലിയ കൂട്ടമാണ് ഇപ്പോൾ സജീവമായിരിക്കുന്നത്. സാധാരണയായി മറ്റ് കുരങ്ങുകൾ കാണുന്ന പ്രദേശങ്ങളിൽ അധികസമയം ചെലവഴിക്കാറില്ലാത്ത ഇവ, ഇപ്പോൾ പാതയോരങ്ങളിൽ സ്ഥിരമായി കാണപ്പെടുന്ന സാഹചര്യമാണ് രൂപപ്പെടുന്നത്.
വഴിയരികിൽ സഞ്ചാരികൾ ഭക്ഷണസാധനങ്ങൾ നൽകാൻ തുടങ്ങിയതോടെ, വാഹനങ്ങൾ കടന്നുപോകുമ്പോൾ അവയുടെ സമീപത്ത് കാത്തുനിൽക്കുന്ന പ്രവണതയും വർധിച്ചിട്ടുണ്ട്. ഇതോടെ മനുഷ്യരോടുള്ള ഭയം കുറഞ്ഞതായും വന്യജീവികളുടെ സ്വാഭാവിക പെരുമാറ്റത്തിൽ മാറ്റം സംഭവിക്കുന്നതായും വനവകുപ്പ് അധികൃതർ വിലയിരുത്തുന്നു. പ്ലാവിന്റെ പൂക്കളിലുള്ള തേൻ തേടിയും കാട്ടുചക്കയുടെ സീസണിലും ആകർഷിക്കപ്പെട്ടുമാണ് സിംഹവാലൻ കുരങ്ങുകൾ വനാതിരുകൾ കടന്ന് പുറത്തേക്ക് എത്തിയതെന്നാണ് വനപാലകരുടെ വിശദീകരണം. സ്ഥിരമായി വാഹനങ്ങളെയും മനുഷ്യരെയും കാണുന്നതിനാൽ ഇവ മനുഷ്യസാന്നിധ്യത്തോട് പരിചിതരായി, പാതയോരങ്ങളിൽ പേടിയില്ലാതെ നിലകൊള്ളുന്നതും പതിവാകുകയാണ്.
വംശനാശഭീഷണി നേരിടുന്ന ഈ ജീവികളുടെ സുരക്ഷ ഉറപ്പാക്കുന്നതിനും സ്വാഭാവിക ആവാസവ്യവസ്ഥ സംരക്ഷിക്കുന്നതിനുമായി സഞ്ചാരികൾ വന്യജീവികൾക്ക് ഭക്ഷണം നൽകുന്നത് ഒഴിവാക്കണമെന്നും ചുരംപാതയിലൂടെ സഞ്ചരിക്കുമ്പോൾ കൂടുതൽ ജാഗ്രത പുലർത്തണമെന്നും വനവകുപ്പ് അധികൃതർ അഭ്യർത്ഥിച്ചു.
പ്രാദേശിക വാർത്തകൾ WhatsApp ൽ ലഭിക്കുന്നതിനായി താഴെ Click ചെയ്യുക👇
https://chat.whatsapp.com/EDw1S5eTwPYCIRpkFAtPjw?mode=hqrt1
